محتار شجرَه صِير أو عصفور
لمّا غيابي يْدقّ عا بابي …
محتار : أصحابي يصيرو طْيور
يمّا ورَق وغْصون … أصحابي …
بكبَر مَ بين اللوز والزعرور
يمّا السّما أحلى مِنِ … الْغابِه؟
عصفور تين بْكُون يَمّا … تين
المنقار أحلى … أو الزوّادِه؟
شو بكون ؟ جانح عا غصن شربين؟
أو كعب شربينِه بْ كعب وادي؟
محتار نقّي موتتي مع مين
وْمين اللي إيدو مالحَه زيادِه :
يَ بْموت عا إيديْن حطّابين
يَ بْموت عا إيديْن … صيّادي …
بْحِبّ الشجَر … وبْحبّ لِعْصافير
وْبحسُد لِ ما بيطير … والطاير
لو كنت بعرف في شجَر بيطير
كنت الشجَر نقّيْت … عالطاير …
ابراهيم شحرور، دكتور في الهندسة المدنية، استاذ جامعي، مدير البرامج في مجلس الإنماء والاعمار ووافد حديث إلى الشعر باللغة المحكية مالكاً درجة التميّز بين مجايليه. بعد الخمسين كتبَ ونشر فأصدر الديوان الأول (أساور من تعب) في العام 2015 وأتبعه بـ"تياب القلوب... قلوب" العام الماضي.
